Անկախության օրվա տոնախմբությունը Ֆրանկոֆոնիայի Բուլվարում

Սեպտեմբերի 21-ին Մասիսում մեծ շուքով տոնվեց Հայաստանի Անկախության 28-ամյակը: AFFA (Adibekyan Family Foundation for Advancement)-ն և Մասիսի զարգացման հիմնադրամը այդ առթիվ անցկացրեցին տոնական միջոցառում, որի ընթացքում քաղաքի բնակիչները և հյուրերը, մեծ շքերթով, Մասիսի կենտրոնական հրապարակից շարժվեցին Ֆրանկոֆոնիայի պուրակ՝ Բուլվար: Քաղաքը այն սակավաթիվներից էր Հայաստանում, որը մասնակցում էր տոնախմբությանը՝ դրանով իսկ ընդգծելով համահայկական տոնախմբությունների հանդեպ իր քաղաքացիների հետաքրքրվածությունը: Մասիսի բնակիչները հնարավորություն ստացան մասնակցելու Հայաստանի Հանրապետության կյանքում պատմական այդ կարևորագույն իրողության տոնախմբությանը: Երթին մասնակցում էին մի շարք դպրոցականներ, ուսուցիչներ և Գյուղատնտեսական քոլեջի ուսանողները: Տոնական շքերթին և համերգային ծրագրին միացան նաև Երկրապահ-կամավորականների միության անդամները և երիտասարդական կազմակերպության ներկայացուցիչները: Մասիսի զարգացման հիմնադրամի համահիմնադիր Լիլիթ Ադիբեկյանը իր ողջույնի խոսքով ազդարարեց տոնախմբության մեկնարկը: Միջոցառման համերգային ծրագիրը բացեց երգիչ Սևակ Ամրոյանը, ելույթ ունեցան նաև «Տարոնցիներ» ազգային երգի-պարի անսամբլը, իսկ երեկոյի ավարտին՝ իր ազգային երաժշտության միքսերով, ելույթ ունեցավ DJ.Beatman-ը, որի երաժշտությունը սիրվեց թե՛ մեծերի, թե՛ երիտասարդների կողմից: Միջոցառումը ավարտվեց շքեղ հրավառությամբ, որը երեկոյան երկինքը զարդարեց զանազան գույներով: